روستای قره کلک
برای معرفی بیشتر روستای زیبای قره کلک
درباره وب سایت


این وب سایت برای معرفی بیشتر روستای قره کلک در فضای مجازی ایجاد شده و تلاش دارد تا با بهره گیری از این فضا پتانسیل ها و ظرفیت های این روستا را برای خوانندگان معرفی کرده و ابزاری باشد برای منعکس کردن مشکلات قره کلک و روستاهای اطراف. شما میتوانید نظرات و پیشتهادات خود را برای ما بفرستید از طریق ایمیل یا شماره تلفن 09360431509

مدیر وب سایت : پرویز فضلی
مطالب اخیر
Make your flash banner free online
نویسندگان
استاد جواد فضلی از اهالی پر شور منطقه ی سهند آباد هشترود و از فرزانگانی است که در جهت اعتلای فرهنگ منطقه زحمات زیادی می کشند از جمله فعالیت های ایشان سرودن اشعار به زبان ترکی آذربایجان است که در این مطلب برای شما به اشتراک گذاشته میشود .شما عزیزان میتوانید از طریق لینک این مطلب کلیه ی اشعار این شاعر بزرگوار که متناوب به روز رسانی می شود را مشاهده کنید در ظمن مطالب آقای فضلی در رابطه با آداب و رسوم و بازیهای محلی هم در ادامه ی مطلب است که می توانید مطالعه فرمایید
یوردوموزا بیر باخیش!!!!
بولاغین قوینوندا بیتیبدی یارپئز.
سووا گلیر الده سَنح ساچلی قئز.
بستاندا اَکیلیر خئرچا، خیار،قارپئز.
آز با چوخ گؤرونور سهند آوادا.

یاشیل لیق کندیمه اولور یاراشیق.
چوللرین بوریور یاشیل سارماشیق.
هر هاوا ایسته سن تویدا،چالیر آشیق.
آز با چوخ گؤرونور سهند آوادا.

اوجاقین اوجالیر گوم-گوی توستوسی.
تندیرده قاینییار شوربا پیتی سی.
تاماشادی تندیردامی قره حیسلیسی.
آز با چوخ گؤرونور سهند آوادا.

اینکلر گَلیرلر آخشام یئلینی دولو.
قویونلار یانیندا قوشا قوزولو.
باغلاری بارلی دی آلماسی دولو.
آز با چوخ گؤرونور سهند آوادا.

ناخیر چی اوتاریر بیر سورو ناخیر.
سامانلیق یانیندا طؤوله ده آخیر.
آخشام کورپه گلسه ننه می چاغیر.
آز با چوخ گؤرونور سهند آوادا.

قادینلار اَلینده فیندیقجا حنا.
مهربان گلینه واردی قئینانا.
صاف اورَک سئویملی گوزل، آنا.
آز با چوخ گؤرونور سهند آوادا.

اینکلر دوغان واخت بولاما آغوز.
چوخالیر یئمکلرده دادینان - دوز.
نینینده سس سالان بانلییان خوروز.
آز با چوخ گؤرونور  سهند آوادا.

داغلاردا کهلیگین قاققیلتی سسی.
دالیسیجا گَزیر ، اونون فره سی.
قویونون سوروسو آغی قره سی.
آز با چوخ گؤرونور سهند آوادا.

کَهَر آت گورونور یئریشی یورقا.
آتی مینیر قوجا بیر بوغو بورما.
ساج اوسته قیزارمئش بوغدا قوورقا.
آز با چوخ گؤرونور سهند آوادا.

بیچینده بیلدیرچین یونجالیق یونجا.
ایشله ییب چیخارلار نَشتووا دینجه.
یئریشله ری اینجی بئللری اینجه.
آز با چوخ گؤرونور سهند آوادا.

یونی اَیریلیر جَهره ده تئشی فریلدار.
تاپانالی آغاش قاپی کتده جیریلدار.
آلا کؤپک نا بلد گورنده مئریلدار.
آز با چوخ گؤرونور سهند آوادا.

تندیرین آغزینا قاپسانار دوواق.
ایلفیده،وَردنه،اَرسین،تاختا تاباق.
بَزه نیر دوزمه ینن تاخچالی اتاق.
آز با چوخ گؤرونور سهند آوادا.

دانیشیر قیفیل سیز رَزه سیز داملار.
مچید قاباغیندا گونش آلیر آداملار.
گیردکان اَکیلیر واردی باغدا باداملار.
آز با چوخ گؤرونور سهند آوادا.

دؤره سین توتوبدی ائولرین باغچا.
آغاشدان پنجره هئره لی تاخچا.
ائوین بیر طرفی باغلی بیر یانی بوخچا.
آز با چوخ گورونور سهند آوادا.

ایل بایرامی یومورتانی چاققیشماق.
داملاری سامانلی سوواق سوواماق.
خاطیره دی بوتون اوردا یاشاماق.
آز با چوخ گؤرونور سهند آوادا.

یئتیشیر قونشودان قونشویا نیسگیل.
دانیشیللار بیر-بیریله شیرین دیل.
جاواد یئییب اوردا دوشابنان خشیل.
آز با چوخ گؤرونور سهند آوادا.

گرَک اولسون اوجاقدا دمیر ماشا.
آرخادیر کندیمده قارداش-قارداشا.
وورولان بیر عاشق بیر قلم قاشا.
آز با چوخ گؤرونور سهند آوادا.

قره کلک منیم دایئم یوردودور.
آغا کیشی یوردو،اَمَن یوردودور.
اونون«ایتی» منطقه نین قوردودور.
آز با چوخ گؤرونور سهند آوادا.

جواد فضلی

تقدیم اولسون «ائلینی،دیلینی،ساخلیان اوغلانلارا-قیزلارا»





باغدیر قارینی*

یئری گؤیو یارادیبسان، ای قادر آلله
سوسوزدور چؤلوموز،یاغدیر قارینی
بیز دئییریک اؤزون بیلن یاخجیدیر
رحمین گلسین بیزه یاغدیر قارینی

قیش فصلینین گوزللیگی قارا باغلیدیر
باغ باخجا نین گوزللیگی بارا باغلیدیر
سندن ساوای ساغلیغیمیز هارا باغلیدیر
شوکر ائلیر ائلیمیز، یاغدیر قارینی

شیره سی چکیلیب داغ -دره دوزون
یوردومون چشمه لری قوی آچا گوزون
گؤرمویوم سارالان سهند آوانین اوزون
نیسگیلیم چوخ آرتار یاغدیر قارینی

رحمین گلسین یاغسا قوروماز باغلار
آل یاشیل گئیینر باش اوجا داغلار
بوستاندا قوروماز شاماما تاغلار
دنیزیم قورویوب یاغدیر قارینی

رحم ائیله سن بیزه ای کرم کانی
تحریم دئییخ سیراب ائله ایرانی
جاواد چولده یاغیش آلتدا ایسلانی
قوتولسون قورولوق یاغدیر قارینی

جواد فضلی

*️گوزل دونیادی*

آرزوم بودور غملی اورک ، اولمایا
گول قونچاسی آچیلمامیش، سولمایا
هئچ بیر اورک کدرلنیب ، دولمایا
اوندا بوللم دونیا گوزل دونیادی

بولبول گولون اوسته نغمه ، اوخویا
باخجا میزدا عطیر ساچا، قوخویا
آداخلی قیز بیگ جورابین ، توخویا
اوندا بوللم دونیا گوزل دونیادی

 اینجیتمیه کیمسه دوستون، یولداشین
آرخا بیله یئنه قارداش ، قارداشین
محرَم بیله دردین دییه ، سیر داشین
اوندا بوللم دونیا گوزل دونیادی

حورمت ائده اؤز اولادی، آتا آنایا
آزالمییا ایچیمیزدن ، آبیری حایا
هئچ کیمین اَمه یی،گئتمییه زایا
اوندا بوللم دونیا گوزل دونیادی

جاوادین اوره گی ، بونا چالیشیر
گورمه یه دونیاسی ، یئنه قاریشیر
کوسنلر هامیسی ، داها باریشیر
اوندا بوللم دونیا گوزل دونیادی

جاوانلار ایشلییه بئکار قالمییا
آتاسیندان جیب خشلیقی آلمییا
حیاتدا تای توشدان دالی قالمییا
اوندا بوللم دونیا گوزل دونیادی

اولمویا هئچ آتا،بالاسیندان شرمنده
ایشه گئدیب آخشام ایشدن گلنده
بالالاری گولر اوزله آتاسینی گورنده
اوندا بوللم دونیا گوزل دونیادی


جواد فضلی


کند اویونلاری

بَییمه‌گیزیر(بَیمَنه گیزیر)

توی اولان چاغ ائلین آغساققا‌لی، قوجاسی، گنجی، اوشاغی و بؤیوگو توی آخشاملاری اوغلان ائوینه ییغیلیب چئشیتلی اویونلار، دبلر و شنلیکلرله تویو یولا سالیردیلار.
او دبلردن بیری، بَییمه‌گیزیر اویونودور. مجلیس دولو اولان چاغ بیر نفر هله‌لیک بَی سئچیلیر. بی اؤزونه بیر نفر گیزیر سئچیر. بی بیر یئرده اوتورور و اونون بویروقلارینی گیزیر یئرینه یئتیریر. گیزیرین اَلینده‌ پارچا‌دان ائشیلیب هؤرولموش بیر شاللاق اولور.
بی بویروق وئریر قتیر ایشله‌سین. بو او دئمکدیر کی، مجلیسده اولانلار سیرا ایله آشیق آتسینلار. آشیق آتیلیر، تووخان گتیرن بی، آوچی گتیرن گیزیر، بؤک گتیرن بیر زاد اولمور، جیک گتیرن اوغرو اولور.
اوغرو دوشن چاغ گیزیر دئییر، بی بیر اوغرو وار نه ائدک؟
اوغرو دوشن یا گرک اوخوسون، یا اویناسین، یا بیر گولمه‌لی اویون چیخارسین، بونلارین هئچ بیری‌سینی بیلمه‌سه، بی اونا شاللاق ووردورور یوخسا اونون باشینا اؤز ایسته‌دیگی اویون و جزا‌لاردان گتیره‌رک مجلیسی ایلَندیریر.
شاللاق وورولما‌لی شخصه، گیزیر شاللاق وورور. اوغرو اللرینی آچماسا اونون بئلینه، قیچینا و هر یئرینه شاللاقلا، وورولور. بی مجلیسین گئدیشاتینی تمامییله اله آلما‌لیدیر. هر ایشین اؤلچو-بیچی‌سینی او دئمه‌لیدیر. بی باجاریقسیز اولاندا مجلیسی اَلینده‌ ساخلایا بیلمیر و تئز قاریشیر، اما باجاریقلی بی بونا ایمکان وئرمیر.
گؤرورسن، آرادا گیزیر اؤز ایشینی یاخشی یئرینه یئتیره بیلمیر، بیین سؤزونه یاخشی باخمیر یا آیری شخصین ده سؤزونه باخیر، بیر سؤزله دئسک گیزیر گؤرَوینی یئرینه یاخشی یئتیره بیلمه‌ینده بی دئییر: “گیزیری آییلدان”؟
مجلیسین یئتکین و گنجلری‌نین چوخو اَلینی قووزایا‌راق گیزیری نئجه آییلداجاغینی سؤیله‌ییر، بی اونلارین بیرینی سئچیر سئچیلن شخص شاللاغی گیزیردن آلیب دئییر؛ بی نه بویرورسان؟
بی ده ایسته‌دیگی بویروغو وئریر اؤرنه‌یین دئییر اون دنه اونون بئلینه شاللاق وور. او دا بو ایشی یئرینه یئتیریر. سونرا بیین ایذنی ایله شاللاغی گیزیره قایتاریر.
اوغرو دوشن شخصی گیزیر بیین قوللوغونا آپاریر، او شخص بیه سایقی ایله داورانما‌لیدیر ایشین هاراسیندا سایقیسیز داورانسا جزاسینی چکمه‌لیدیر. بی سوروشور بورا نه‌یه گلمیسن؟ اوغرو دا اؤز باجاریق و ذکاسی ایله باغلی مجلیسی ایلندیرن و خوشا گلیملی سؤزلردن تاپیب دئییر. بی ده اؤز باجاریغی و زکاسییلا باغلی اونو باغلایا‌راق گولدوروجو و ایلندیریجی جزا‌لار بویورا‌راق مجلیسه ذؤوق وئریر. بو آرادا مجلیسده اولانلاردا آرادا جزا اؤنری وئریرلر. اؤرنه‌یین بیری دئییر: بی بو اوغرودان یامان تاختا چیخار، بی باخیر اوغرو یوغون اولسا تاختا یونان اوستا آختاریر و اوستا تاپیلاندان سونرا اوغرودان تاختا یونماغا باشلاییر.
بوردا گئدن بوتون ماجرا‌لار اؤنجه‌دن یازیلمیش دئییل بلکه درحال عاغیلا گلن ایشلردیر. اونا گؤره مجلیسده شوخلوقچو، تجروبه‌لی و دونیاگؤرموش شخصین چوخ اولماسی مجلیسین یاخشی اولماسینا مونجر اولور.
بی دَییشیلمه‌سین دئیه چوخ زامان قتیر ایشلمه‌یه یول وئرمیر. و مجلیسی اؤز ایسته‌دیگی کیمی دولاندیریر. اما مجلیسین گئدیشاتینی اوردا اوتورانلار بینمه‌سه آغیز-آغیزا وئره‌رک ناراضی اولدوقلارینی بیلدیریرلر و بی ده اونلارین ایسته‌یینه قولاق وئرمه‌لی اولور.
بئله مجلیسلرده چوخلو گؤرکملی شخصلره دولاشیرلار. آرادا گؤرورسن آیری محلدن تویا بیر قوناق گلیب. بی اونو چاغیرتدیریر و سوروشور قوناق نه بیلیرسن؟ قوناق دا بیلدیگینی دئییب عمل ائدیر تا جانینی جزا‌دان قوتارسین.
بو اویون او قدر شیرین اولوردو کی، اوردا کئچن اویونلاردان گونلرجه آرا‌لیقدا دانیشیلیردی، تویلاردان چوخ شیرین خاطیره‌ کیمی یاددا قالیردی.
بیلیریک کی، اوزون زامانلاردان بری موختلیف بؤیوک ایمپئراتورلوقلارییلا یاناشی بیزیم آذربایجاندا خانلیقلار اولموشلار. خان قووّه‌‌سی چاتان یئره کیمی اؤزونه خانلیق سئچیب بیر دؤولت کیمی اونو ایداره ائدیردی. بو خانلیقلار بیزیم دؤولتچیلیک تاریخیمیزی اولوشدورسا‌لار دا، اؤلکه‌نی ایلک پارچالایانلار اولوبلار. بو خانلیقلار آرادا البیر اولوب یاغی و یابانچی دوشمنله ووروشسا‌لار دا چوخ واختلار بیر-بیرلری ایله دؤیوشوب یوردو او یان-بویانا چکیردیلر. ایلک چاغ روسیا آد آچیب آذربایجانا تاماه سالاندا قارشی‌سیندا بیرپارچا و بوتؤو بیر مملکت یئرینه بؤلوک-بؤلوک خانلیقلار گؤردو و بودا اونون اودا بیلدیگی تیکه‌لر اولدوغو اوچون تاماهینی آرتیردی.
خانلیقلارین تاماهی اولمایان یئرلر یا اونلارین اَلی آلتیندا اولان یئرلرین بی‌لیگی اولوردو. بی‌لیگین بَیی بیر نئچه کنده اوبایا باخیردی. بی‌لیکده بَی‌ین فرمانی ایشله‌ییردی. دئمه‌لی بی‌لیک کیچیک بیر ایجتیماعی ایداره‌چیلیک سیستئمی ایدی.




بَییمه گیزیر(بَیمَنه گیزیر)
آذربایجاندا ایسلام اینقیلابی دئوریمینه قدر بی‌لیک سیستئمی قووّه‌ده ایدی. سون چاغلاردا بی‌لر اؤز ایداره ائتدیگی بؤلگه‌نی یؤنَتمک اوچون شاه‌دان حؤکم آلیردیلار. اونا گؤره شاهلیق رئژیمی دئوریلدیگینده بی‌لر قووّه‌دن دوشدولر.



کند اویونلاری

توپ‌اَرَبی/ توپ آغاجی

بو اویوندا، خرمن بویوندا بیر یئرین ایکی باشیندا، دایره شکلینده ایکی جیزیخ (هبه) چکیلیر. قدیم پارچا‌لارین یا نایلون قیریقلارین بیر یئره توپلاییب، بیر-بیری‌نین اوستونه ساریییب سوندا بیر تیکه قاتما ایله اونو ساریییب توپ شکلینه سالیردیلار. بو توپ تنیس توپو قدر یا بیر آز ایری اولور. بو اویوندا سون زمانلار تنیس توپوندان دا استفاده اولونور.

اویونچولار ایکی بؤلومه بؤلونور. پوشک آتیلیر. پوشکو اودان اویونچولار هبه‌نین ایچینه گیریرلر.

چؤلده اولان اویونچولار ایکی هبه‌نین آراسیندا اولان یولون کناریندا، اویونچولار اولان هبه‌یه یاخین سپه‌لنیرلر و هبه‌یه یاخین اولان اویونچو توپو ایچه‌ریده اولان اویونچولارا، گؤیه آتیر. ایچه‌ریده اولان اویونچولارین باشچی‌سی یا آیری بیری، گؤیه آتیلان توپو اَلی ایله محکم وورا‌راق اوزاقلاشدیرماغا چالیشیر.

توپو وورارکن، هبه‌ده اولان اویونچولاردان، بیری یا نئچه‌سی، او بیری هبه‌یه قاچیرلار. چؤلده‌کیلر وورولان توپو گؤیده توتموش اولسا‌لار اویونچولارین یئرلری دییشیر. یوخسا یئره دوشن توپو تئز گؤتورورلر قاچان اویونچولارا آتیرلار. توپ اونلاردان بیرینه دَیَرسه، توپ دَیَن شخص اویوندان چیخیر. توپ دیمه‌ین اؤزونو او بیری هبه‌یه یئتیریب اَلینی اورا وورور،  گیره‌وه اولسا قاییدیب هبه‌یه قاچیر اولماسا او هبه‌ده دایانیب توپون بیر داها وورولوب اوزاقلاشماسینی گؤزله‌ییر.

هبه‌ده‌کیلر توپو وورارکن، هبه‌دن قاچان اولماسا، یوخسا آتیلان توپو هبه‌ده‌کیلر وورا بیلمه‌سه و توپ یئره دوشسه، چؤلده‌کیلر توپو گؤیه آتیر-توتور (بوی وئریر) بو زمان گرک بیری ایچه‌ریدن او بیری هبه‌یه قاچا. بو زمان چؤلده‌کیلر قاچانی وورورب سیرا‌دان چیخارماق اوچون توپ آتیرلار. ایچه‌ریده اولان اویونچولارین هامی‌سینی ووروب قوتاردیقدان سونرا یئرلر دییشیلیر. اویون ساعتلارلا بو شکیلده سورور.

بو اویونو یئنی‌یئتمه‌لر و جاوانلار پاییزدا و بایرام قاباغی و یا دا بایرام گونلرینده اوینویاردیلار. ساعتلارلا داوام ائدن اویوندا قاچماغا گوره اویونچولار اَیله‌نرکن فیزیکی جهتدن ده قیوراغ
اولوردولار







نوع مطلب :
برچسب ها :
لینک های مرتبط :
 
لبخندناراحتچشمک
نیشخندبغلسوال
قلبخجالتزبان
ماچتعجبعصبانی
عینکشیطانگریه
خندهقهقههخداحافظ
سبزقهرهورا
دستگلتفکر
نظرات پس از تایید نشان داده خواهند شد.


آمار سایت
  • کل بازدید :
  • بازدید امروز :
  • بازدید دیروز :
  • بازدید این ماه :
  • بازدید ماه قبل :
  • تعداد نویسندگان :
  • تعداد کل پست ها :
  • آخرین بازدید :
  • آخرین بروز رسانی :
پربازدیدترین مطالب

کد پربازدیدترین